Աթոռակռիվ տվողները մեզ հետ չեն
Սույն թվականի դեկտեմբերի 5-ին Արագածոտնի մարզի Թալին խոշորացված համայնքում նույնպես սպասվում են ՏԻՄ ընտրություններ: Խոշորացման արդյունքում Թալին քաղաքը և հարակից 28 գյուղական համայնքները միավորվում են։ Ընտրություններին մասնակցության հայտ են ներկայացրել «ՔՊ» կուսակցությունը, որի ավագանու ցուցակը գլխավորում է Թալինի քաղաքապետի պաշտոնակատար Տավրոս Սափեյանը, «Հայք» լիբերալ կուսակցությունը, որտեղ ավագանու ցուցակը գլխավորում է Թալինի թիվ 1 հիմնական դպրոցի ուսուցիչ Կարեն Գրիգորյանը, «Մեր Համայնքը» կուսակցությունների դաշինքը, որը գլխավորում է «Ղազար Սարգսյան» Ա/Ձ-ի մենեջեր Տիգրան Հարությունյանը, «Զարթոնք» Ազգային Քրիստոնեական կուսակցությունը, որի ավագանու ցուցակը գլխավորում է Թալինի նախկին քաղաքապետ, ԱԺ նախկին պատգամավոր, այժմ «Թալին ԱՏՃ» ՓԲԸ-ի գլխավոր տնօրեն Մնացական Մնացականյանը:
«Գործարար հայելին» զրուցել է Թալինում «Քաղաքացիական պայմանագիր» կուսակցության ավագանու ցուցակը գլխավորող թեկնածուի՝ Տավրոս Սափեյանի հետ:
– Պարոն Սափեյան, ինչո՞ւ որոշեցիք առաջադրել Ձեր թեկնածությունը Թալինի խոշորացված համայնքի ընտրություններում՝ գլխավորելով «ՔՊ»-ի ավագանու անդամների ցուցակը։
– Առաջադրվել եմ՝ տեսնելով այս վիճակը, այսինքն՝ ով քնից շուտ արթնանում է, ուզում է համայնքի ղեկավար կամ պատգամավոր դառնալ: Դա է պատճառը, ես ինքս եմ որոշել։
– Ինչպե՞ս է ընթանում նախընտրական փուլը: Քանի որ ունեք երեք մրցակից, արդյոք տարվո՞ւմ է սև փիառի քաղաքականություն Ձեր նկատմամբ, կա՞ն խոչընդոտներ մրցակիցների կողմից:
– Նորմալ նախընտրական մթնոլորտ է: Իմ հանդեպ սև փիառ չի իրականացվում, ինչը չեմ կարող ասել մեր կուսակցության՝ «ՔՊ»-ի համար: Կան մարդիկ, որ առիթավորվում են՝ օգտվելով մեր երկրում տիրող հետպատերազմական վիճակից, ասում են՝ տարածքներ են տվել, գյուղեր են տվել, դիրքեր են տվել՝ փորձելով այդպիսով իրենց անունը բարձրացնել։ Չեմ կարծում, որ կարող են խոչընդոտներ ստեղծել, հակառակ դեպքում կենթարկվեն պատասխանատվության օրենքի ողջ ուժով։
– Ովքե՞ր են այսօր Ձեր կողքին:
– Իմ կողքին է ժողովուրդը, այն մարդիկ, որոնք հասկանում են շատ բան և մտածում են այս երկրի մասին: Նրանք, ովքեր պատերի տակ խոսում են ու աթոռակռիվ են տալիս, մեզ հետ չեն։
– Ինչպե՞ս եք գնահատում ընտրվելու Ձեր հնարավորությունները։
– Բարձր եմ գնահատում, բայց մեր բարբառով ասեմ՝ ընտրությունները անկտրել ձմերուկ ա։ Հաղթանակը միանշանակ մերն է լինելու։ Ընտրվելու դեպքում լինելու եմ ընտրողի և չընտրողի համայնքի ղեկավարը: Բոլորն էլ մեր համայնքի բնակիչներն են, տարբերակում չի լինելու։
– Պարոն Սափեյան, քանի որ 2021 թ. օգոստոսից եք ՏԻՄ համակարգում, պատկերացում ունե՞ք գյուղական համայնքներում առկա խնդիրների վերաբերյալ, և որո՞նք են, ըստ Ձեզ, առաջնային լուծում պահանջողները։
– Իհարկե, ամբողջությամբ տեղյակ եմ մեր Թալին խոշորացված համայնքի բոլոր բնակավայրերի խնդիրներից, որոնք հիմնականում բոլոր գյուղերում էլ նույնն են: Իհարկե, շատ խնդիրներ կան, ինչպես օրինակ ճանապարհների բարեկարգման, աղբահանության այլ հարցեր, սակայն առաջնային եմ համարում ոռոգման և խմելու ջրերի խնդիրը: Այս հարցի լուծման գերակշիռ մաս կկազմի այն, որ վերագործարկվեն չօգտագործվող աղտոտված ջրամբարները:
– Ի՞նչ եք կարծում, կլինե՞ն արդար և թափանցիկ ընտրություններ։
– Այո, կլինեն:
– Առաջադրված քաղաքական ուժերի ավագանու ցուցակը գլխավորողներից ո՞ւմ եք համարում լուրջ մրցակից:
– Հավատացեք, չկա այդպիսի մեկը: Նրանց անցյալը պետք է նայել: Երկու թեկնածու կա, նրանց կուսակցական անցյալը նայելով եթե մեր ժողովուրդը որոշի նմանների հետևից գնալ, թող գնա, միայն ասեմ, որ ուղղակի անուններն են փոխել, ջայլամի պատմություն են արել՝ գլուխը թաղել են ավազի մեջ, մտածելով՝ իրենց ոչ ոք չի տեսնում: Օրինակ ՀՅԴ կուսակցությունը այս ընտրություններին մասնակցում են «Իմ համայնք» անունով, բայց ցուցակները, երբ նայում ես, տեսնում ես, որ բոլորը դաշնակցականներեն։
– Թալին խոշորացված համայնքի բնակիչներն ինչո՞ւ պիտի ընտրեն հենց Ձեզ:
– Կարծում եմ՝ իմ անցած ճանապարհը հաշվի առնելով: Ընդամենը երեք ամիս է, որ ես Թալինի քաղաքապետի ժՊ եմ, սակայն հասցրել եմ բազմաթիվ խնդիրներ լուծել բյուջեի սուղ միջոցներով, ինչպես նաև իմ ընկերական շրջապատի, իմ անձնական միջոցների շնորհիվ: Մասնավորապես՝ անվճար ավտոբուս ենք տրամադրել ուսանողներին, կատարել ենք ճանապարհների մասնակի ասֆալտապատում, աղբահանությունն ենք բարելավել, բակերից կրպակներն ենք հանել՝ հետագայում, իմ ընտրվելուց հետո, խաղահրապարակներ կառուցելու նպատակով: Արդեն իսկ ունենք բակերից մեկում նախատեսվող խաղահրապարակի մակետը։
– Պարոն Սափեյան, ի՞նչ կուղղեք ընտրողներին:
– Կցանկանայի, որ ընտրություն կատարեն մաքուր, արդար սրտով, կանգնեն այն մարդու կողքին, որն իսկապես իր երկրի, տարածաշրջանի, համայնքի մասին է մտածում, ով ի զորու է լուծելու համայնքներում ծառացած խնդիրները: Անկախ նրանից՝ ես կլինեմ, թե մյուս քաղաքական ուժերից որևէ մեկը, թող իրենց մեջ ուժ գտնեն և կանգնեն մեր պետության, մեր համայնքների կողքին:
Ի դեպ, Տավրոս Սափեյանը մասնակցել է 2016 թ. Արցախի քառօրյա և 2020 թ. Արցախյան երկրորդ՝ 44-օրյա պատերազմին։ 2018-ից մինչ օրս Երկրապահ կամավորականների միության Արագածոտնի մարզի փոխնախագահն է։
