Ավելի զարգացած ու բարեկեցիկ համայքնի տեսլականով․ Արթիկի ՔՊ թեկնածու

Սույն թվականի դեկտեմբերի 5-ին Շիրակի մարզի Արթիկ խոշորացված համայնքում նույնպես սպասվում են ՏԻՄ ընտրություններ: «Քաղաքացիական պայմանագիր» կուսակցությունն այս համայնքում առաջադրել է Պեմզաշեն համայնքի ղեկավար Անանիկ Ոսկանյանի թեկնածությունը:

Ընտրություններին ընդառաջ զրուցեցինք նրա հետ:

– Պարոն Ոսկանյան, որո՞նք են Ձեր նախընտրական ծրագրերը, որ կյանքի կկոչեք ընտրվելու դեպքում։

– Հիմնանորգել և բարեկարգել ներհամայնքային ճանապարհները, մայթերը, փողոցները, բարեկարգել դեպի արոտավայրեր տանող ճանապարհները։ Մեր ծրագրերից է նաև գյուղական բնակավայրերի խմելու ջրի և ոռոգման համակարգերի բարելավումը։ Շարունակելու ենք բազմաբնակարան շենքերի բարեկարգման աշխատանքները, ստեղծելու ենք նոր մանկական խաղահրապարակներ։ Վերազինելու ենք Արթիկ խոշորացված համայնքի բոլոր թաղամասերի բազմաբնակարան շենքերի  բակերի արտաքին լուսավորության ցանցը նոր տիպի՝ «լեդ» տնտեսող լուսատուներով։ Ձեռք ենք բերելու հաշմանդամություն ունեցող անձանց համար նախատեսված հատուկ նստատեղով ավտոբուսներ։ Բարեկարգելու ենք կանգառները։ Ապահովելու ենք ներհամայնքային երթուղիների կանոնակարգված սպասարկում։ Ստեղծելու ենք նոր կանաչապատ տարածքներ։ Սանիտարական մաքրման և աղբահանության ոլորտին առնչվող բարեփոխումներ ենք կատարելու։ Հիմնանորոգելու ենք համայնքի մշակութային օջախները և համալրելու ենք անհրաժեշտ գույքով։ Աջակցելու ենք գյուղմթերքի վերամշակման արտադրությունների ստեղծմանը և դրանց իրացմանը։ Օժանդակություն ենք ցուցաբերելու համայնքի բազմազավակ անապահով ընտանիքներին, տարեցներին, հաշմանդամություն ունեցող անձանց, զոհված ազատամարտիկների ընտանիքներին։ Ստեղծելու ենք ցերեկային խնամքի կենտրոն միայնակ անապահով տարեցների համար և այլ ծրագրեր, որոնց մասին ավելի մանրամասն ներկայացված է իմ նախընտրական բուկլետում։

– Առաջադրվել է 6 քաղաքական ուժ, ուժեղ մրցակցություն է Արթիկ խոշորացված համայնքի ընտրություններում: Ինչպե՞ս է ընթանում նախընտրական փուլը։

– Մրցակցությունը  բնականաբար թեժ է, քանի որ 6 քաղաքական ուժ է մասնակցում այս ընտրապայքարում: Հաշվի առնելով երկրում տիրող սահմանային լարվածությունը՝ քարոզարշավը վերսկսել ենք նոյեմբերի 22-ից: Մենք մեր քարոզարշավն ենք իրականացնում, հանդիպում ենք բնակիչների հետ, ներկայացնում մեր ծրագրերը, ինչո՞ւ չէ, ևս մեկ անգամ լսում բնակիչների կողմից բարձրացված խնդիրների մասին, որոնք գրեթե ամբողջությամբ ներառված են մեր նախընտրական ծրագրում: Մեր ընտրվելու դեպքում այդ ամենը իրականություն է դառնալու։

– Պարոն Ոսկանյան, ովքե՞ր են Ձեր թիմում և Ձեր կողքին։

– Մեր թիմում այն մարդիկ են, ովքեր ակտիվ մասնակցություն ունեն իրենց համայնքների զարգացման գործում: Այդ մարդկանց նպատակը մեկն է՝ համայնքային զարգացում, շենացում, լծվել աշխատանքի ու բարեկեցիկ կյանք ապահովել մեր երիտասարդների, երեխաների համար։

– Իսկ Արթիկ խոշորացված համայնքի բնակիչները ի՞նչ խնդիրներ են  բարձրացնում։

– Բոլորն էլ ուզում են իրենց քաղաքը, գյուղը, համայնքը տեսնել ավելի զարգացած, ավելի բարեկեցիկ, մաքուր, ապահով ու անվտանգ: Ընդհանուր առմամբ՝ խնդիրները կենցաղային են, որոնց լուծման ճանապարհները՝ որպես համայնքի ղեկավարներ՝ արդեն տարիների փորձ ունեցող (մեր թիմը համալրված է բոլոր գյուղական համայնքների ղեկավարներով), լավ պատկերացում ունենք, թե ինչ է նշանակում համայնք, համայնքային զարգացում, համայնքային զարգացման ծրագրերի իրականացում: Դրա համար էլ լծվել ենք աշխատանքի, ուզում ենք մեր համայնքներն ավելի զարգացած ու բարեկեցիկ տեսնել։

– Պարոն Ոսկանյան, ինչպիսի՞ն է նախընտրական մթնոլորտը, արդյոք տարվո՞ւմ է սև փիառի քաղաքականություն մրցակիցների կողմից։

– Ընդհանուր մթնոլորտը կալելի է համարել բավարար: Մենք՝ բոլոր թեկնածուներս, լավ ճանաչում ենք միմյանց: Բոլորս էլ գիտենք՝ ով ով է, ինչպիսին է, չեմ կարծում, որ ներկայացման կարիք կա: Բոլորի հետ էլ եղել են ու կան նորմալ հարաբերություններ: Ի վերջո, ամսի 5-ից հետո գալու է ամսի 6-ը, շարունակելու ենք մեր բնականոն կյանքը։

– Ի՞նչ եք կարծում, կլինե՞ն արդար և թափանցիկ ընտրություններ։

– Կարծում եմ՝ այո:

– Ունեք 5 մրցակից, ո՞ւմ եք համարում լուրջ մրցակից։

– Ես չեմ ուզում ինչ-որ մեկին գերագնահատեմ, իսկ մյուսներին՝ թերագնահատեմ: Բոլորն էլ այս պահին ինձ հավասար մրցակիցներ են: Ընտրությունների արդյունքները ընթացքում ցույց կտան։

– Ինչպե՞ս եք գնահատում ընտրվելու Ձեր հնարավորությունները։

– Բավարար։