Արցախի ՊԲ նախկին հրամանատար Միքայել Արզումանյանը կալանավորվել է
Արցախի Հանրապետության պաշտպանության նախկին նախարար-Պաշտպանության բանակի նախկին հրամանատար, Արցախի Հանրապետության նախագահի գործող գլխավոր խորհրդական Միքայել Արզումանյանը կալանավորվել է: Տեղեկությունը «Ֆեյսբուքի» իր էջում հայտնել է վերջինիս պաշտպան Երեմ Սարգսյանը:
Նշենք, որ երեկ Արզումանյանը ազատ էր արձակվել, քանի որ լրացել էր նրա ձերբակալման ժամկետը: Երեմ Սարգսյանը հայտնել էր, որ Արզումանյանին կալանավորելու վերաբերյալ միջնորդություն է ներկայացվել դատարան:
Նշենք, որ նա իրեն առաջադրված մեղադրանքը չի ընդունում։Ըստ ՀՀ քննչական կոմիտեի՝ Միքայել Արզումանյանը ձերբակալվել է Շուշիի և հարակից շրջանների պաշտպանության կազմակերպման ընթացքում պաշտոնեական անփութություն կատարելու համար։ Նրան մեղադրանք է առաջադրվել 2003 թվականի ապրիլի 18-ին ընդունված ՀՀ քրեական օրենսգրքի 375-րդ հոդվածի 3-րդ մասով (համապատասխանում է ՀՀ գործող քրեական օրենսգրքի 550-րդ հոդվածի 3-րդ մասին, այն է՝ զինվորական պաշտոնեական անփութություն):
