Բալիում իրար հաջորդած 2 ուժգին երկրաշարժ է գրանցվել

Ինդոնեզական Բալի կղզու հարավային հատվածում 5,6 և 5,0 մագնիտուդ ուժգնությամբ երկու իրար հաջորդած երկրաշարժեր են տեղի ունեցել, հայտնել է երկրի օդերևութաբանության, կլիմայաբանության և երկրաֆիզիկայի գործակալությունը (BMKG):

Երկրաշարժը տեղի է ունեցել Դենպասար քաղաքից 86 կիլոմետր դեպի հարավ տեղական ժամանակով ժամը 07.36-ին և 07.37-ին (ՀՀ ժամանակով համապատասխանաբար 04.36 և 04.37):

«Երկրաշարժեր տեղի են ունեցել ծովում 10-13 կիլոմետր խորության վրա»,- ասվում է գործակալության «Թվիթեր»-ի էջում հրապարակված հաղորդագրության մեջ։

Հնարավոր զոհերի կամ ավերածությունների մասին տեղեկություններ չկան։ Ըստ սեյսմոլոգների՝ ցունամիի հավանականությունը քիչ է: