Բանիմացությունը զարգացման ուղի․Բաղրամյանի ՔՊ թեկնածու

Արմավիրի մարզի Բաղրամյան խոշորացված համայնքն իր մեջ ներառում է 14 բնակավայր: Այստեղ նույնպես դեկտեմբերի 5-ին սպասվում են ՏԻՄ համամասնական ընտրություններ, առաջադրվել է 3 քաղաքական ուժ: «Քաղաքացիական պայմանագիր» կուսակցությունն այս համայնքում առաջադրել է Շանթ Առաքելյանի, «Արդար Հայաստան» կուսակցությունը՝ Դալարիկ համայնքի ղեկավար Ալիկ Պողոսյանի, «Մեր Բաղրամյանը» կուսակցությունների դաշինքը՝ Սարգիս Հեքիմյանի թեկնածությունը:

Ներկայացնում ենք մեր հարցազրույցը Շանթ Առաքելյանի հետ:

– Պարոն Առաքելյան, ի՞նչ մասնագիտություն ունեք, և կխնդրեմ Ձեզ՝ ներկայացնել Ձեր աշխատանքային գործունեությունը։

– Սովորել և ավարտել եմ Ագրարային համալսարանը՝ ստանալով ագրոնոմի որակավորում: Այնուհետև աշխատել եմ Հ․Պետրոսյանի անվան հողագիտության, ագրոքիմիայի և մելորացիայի գիտական կենտրոնում՝ որպես գիտաշխատող, 2018-2021թթ.-ին՝ ՀՀ տարածքային կառավարման և ենթակառուցվածքների նախարարությունում՝ որպես Տեղական ինքնակառավարման քաղաքականության վարչության համայնքային տեղեկատվական հոսքերի կառվարման բաժնի առաջատար մասնագետ: Այնուհետև մինչ օրս «Արմավիր» ՋՕԸ-ում որպես իրացման գծով փոխտնօրեն եմ։

– «Քաղաքացիական պայմանագիր» կուսակցությունն ինչո՞ւ և ինչպե՞ս որոշեց Բաղրամյանում առաջադրել Ձեր թեկնածությունը:

– Նախ շնորհակալություն «ՔՊ» վարչությանը, որ իմ թեկնածությունը առաջադրել է: 2016 թ.-ից «ՔՊ» անդամ եմ, կարելի է ասել՝ կուսակցության ստեղծման ակունքներում կանգնած մարդ եմ եղել։

– Ծրագրային դրույթները կազմելիս ինչո՞վ եք առաջնորդվել։

– Առաջնորդվել եմ Բաղրամյանի տարածաշրջանի համայնքների խնդիրները հատ առ հատ իմանալով, իհարկե, բնակիչների կարծիքները հաշվի առնելով: Այն խնդիրները, որոնք մտահոգում են ժողովրդին և տարիներ շարունակ չեն լուծվել, ներառված են մեր ծրագրում։

– Պարոն Առաքելյան, ասացեք խնդրեմ, ինչպե՞ս եք պատկերացնում խոշորացված 14 բնակավայրերի կառավարումը և խնդիրների լուծումը։

– Ինչպես գիտեք, համայնքների խոշորացումից հետո բոլոր բնակավայրերում լինելու է վարչական շենք, վարչական ղեկավար և աշխատողներ, իհարկե, ավելի քիչ, բայց ունենալով ավագանու լավ թիմ, վարչական ղեկավարների լավ թիմ՝ կածում եմ՝ ոչ մի խոչընդոտ չի լինելու կառավարման  և ծրագրերի կյանքի կոչման համար։

– Ավագանու ցուցակը կազմելիս ի՞նչն եք հիմք ընդունել:

– Ավագանու ցուցակը կազմելիս նախ այնպես ենք արել, որ բոլոր համայնքներից ներկայացուցիչներ լինեն: Մեր ավագանու ցուցակում ընդգրկված են դպրոցի տնօրեններ, ուսուցիչներ, իրավաբաններ, կրթության մասնագետներ, հողագործներ: Բոլոր ոլորտներից ընդգրկել ենք այն մարդկանց, որոնք իրենց գյուղում հարգանք և պատիվ են  վայելում։

– Պարոն Առաքելյան, քարոզարշավի ընթացքում բնակիչների հետ հանդիպման ժամանակ ի՞նչ հարցեր  են բարձրաձայնվում։

– Հարցերը բազմազան, բազմաբնույթ են: Ինչպես գիտեք, Բաղրամյանի տարածաշրջանը հիմնականում գյուղատնտեսական գոտի համարվելով, այնուամենայնիվ,  ունի ոռոգման ջրի խնդիր: Նախ՝ ոռոգման ջրի հետ կապված հարցեր են, երկրորդը՝ համայնքային ճանապարհների բարեկարգման, մանկապարտեզների հարցեր. կան գյուղեր, որոնք դպրոցային պայմաններ չունեն, դեռևս կոմունիստական ժամանակներից մնացած ինչ-որ շինություներ են, որոնք ժամանակին եղել են ծննդատուն, հետո վերափոխվել են դպրոցի: Մի խոսքով, հարցերը բազմաթիվ են ու բազմաբնույթ։

– Ունեք 2 մրցակից, որևէ մեկին Ձեզ լուրջ մրցակից համարո՞ւմ եք։

– Ես չեմ ցանկանում որևէ մրցակցի թերագնահատել, բոլորին էլ լուրջ եմ վերաբերվում: Սա քաղաքական պայքար է, և, իհարկե, մրցակցությունը լուրջ է։

– Արդյոք կա՞ն խոչընդոտներ, տարվո՞ւմ է սև փիառի քաղաքականություն ընդդիմադիրների կողմից։

– Անկեղծ ասած՝ նման բան չեմ լսել, դեռ չեմ լսել, որ իմ անձի հետ կապված սև փիառ լինի: Չեմ էլ կարծում, թե կլինի, որովհետև չկա մի այնպիսի բան, որ կարողանան իմ անձի շուրջ ինչ-որ խոսակցություն անեն։

– Ի՞նչ եք կարծում, մինչև վերջ այսպես հարթ կընթանա նախընտրական ժամանակահատվածը։

– Կարծում եմ՝ այո: Որևէ լուրջ խոչընդոտ մեր և ընդդիմադիրների կողմից չի լինի, նորմալ կընթանա մինչև վերջ։

– Եվ լինելո՞ւ եք ընտրողի և չընտրողի ղեկավարը ընտրվելու դեպքում։

– Եթե առաջնորդվեմ այն մտքով, որ միայն ինձ ձայն տվողների համայնքի ղեկավարն եմ, նախ չեմ կարող աշխատել, և երկրորդն էլ՝  ինձ ձայն տվողներն անգամ կսկսեն չհարգել: Եթե ընտրվեմ, լինելու եմ բոլորի համայնքի ղեկավարը՝ թե՛ չընտրողի, թե՛ ընտրողի: Ինչպես քարոզարշավի ժամանակ ասել եմ՝ համայնքապետարանի դռները բաց են լինելու բոլորի առջև, իմ անձնական  հեռախոսահամարը բոլորը ունեն։

– Ինպե՞ս եք գնահատում ընտրվելու Ձեր շանսերը։

– Բավականին բարձր։

– Ընտրվելու  դեպքում կադրային փոփոխություններ ինչպե՞ս կիրականացնեք, կադրային քաքաքականություն վարելիս ինչո՞վ եք առաջնորդվելու։

– Ես  որոշել  եմ, որ համայնքապետարանի աշխատողները լինելու են առաջնահերթ բանիմաց, խելացի, փորձառու, չի գործելու ծանոթ-բարեկամ-հարազատ սկզբունքը: Աշխատակիցները կընտրվեն օրենքով, մրցութային կարգով. ով կմասնակցի ու կհաղթի մրցույթում, նա էլ կընտրվի: Ես չեմ ընտրելու ինձ բարեկամ, հարազատ մարդկանց: Իմ ընտրվելու դեպքում  նաև դուք՝ լրագրողներդ կարող եք գալ, տեսնել ու համոզվել, որ իմ բարկամներից ոչ ոք այնտեղ ներգրավված չի լինելու։ Առաջնահերթությունը բանիմաց, փորձառու կադրերին եմ տալու, ինչո՞ւ չէ, նաև նորավարտ երիտասարդներին, որոնք կցանկանան լինել իմ կողքին և ինձ հետ զարգացնել մեր համայնքը:

– Պարոն Առաքելյան, ի՞նչ կցանկանաք ասել ընտրողներին:

– Նախ ընտրողին կողջունեմ: Հույս ունեմ, որ ճիշտ ընտրություն կանեն: Ճիշտ է, երկրի ներքաղաքական վիճակը մի քիչ անկայուն է, բայց, համոզված եմ, որ կկայունանա: Ամեն դեպքում թող ճիշտ ընտրություն կատարեն: Հաջողություն եմ մաղթում մնացած բոլոր թեկնածուներին։