Բոլոր բնակավայրերի կայուն ու հավասարաչափ զարգացում՝ աշխատասիրությամբ ու հետևողականությամբ. Մեծամորի ՔՊ թեկնածու
Սույն թվականի դեկտեմբերի 5-ին Արմավիրի մարզի Մեծամոր խոշորացված համայնքում ՏԻՄ ընտրություններին մասնակցելու համար «Քաղաքացիական պայմանագիր» կուսակցության համամասնական ցուցակով որպես համայնքի ղեկավար առաջադրվել է Արմավիրի մարզպետի նախկին տեղակալ, սույն թվականի նոյեմբերի 2-ից Մեծամոր համայնքի ղեկավարի պաշտոնակատար Վահրամ Խաչատրյանը:
Վահրամ Խաչատրյանը ծնունդով Արմավիրի մարզի Նորապատ գյուղից է: Ավարտել է Երևանի մենեջմենթի համալսարանը՝ ձեռնարկությունների տնտեսագիտություն և կառավարում մասնագիտությամբ: Աշխատել է որպես Նորապատ համայնքի ղեկավար, այնուհետև ՀՀ Արմավիրի մարզի մարզպետի տեղակալ:
Վ. Խաչատրյանի նախընտրական ծրագրերում ընդգրկված են տարածքային զարգացման խնդիրներ, որոնք վերաբերում են քաղաքաշինության, գյուղատնտեսության, ձեռնարկատիրական գործունեության, տրանսպորտի սպասարկման, կրթության, մշակույթի, սպորտի, զբոսաշրջության և այլ ոլորտներին: Մասնավորապես՝ նախատեսվում է հիմնանորոգել և վերանորոգել ճանապարհները՝ հարակից մայթերով, բազմաբնակարան շենքերի վերելակներն ու տանիքները, բարելավել խմելու ջրի և ոռոգման համակարգերը, կառուցել Մեծամոր խոշորացված համայնքի ճանապարհների արտաքին լուսավորության ցանցը՝ նոր տիպի «լեդ» լուսատուներով: Վերանորոգվելու են համայնքի մշակութային կենտրոնները, մանկապարտեզները: Գյուղատնտեսությունը զարգացնելու համար կիրականացվեն մի շարք աշխատանքներ, մասնավորապես՝ աջակցություն ներքին շուկայում գյուղմթերքի իրացմանը, վերամշակմանն ու արտահանմանը, ինչպես նաև սկսնակներին ոլորտի զարգացմանը նպաստող անհրաժեշտ տեղեկատվության տրամադրում և այլն: Ծրագրում անդրադարձ կա նաև աղբահանության, տրանսպորտի խնդիրներին:
Սոցիալական աջակցություն կտրամադրվի զոհված ազատամարտիկների հարազատներին, հաշմանդամություն ունեցող անձանց, տարեցներին, անապահով բազմազավակ ընտանիքներին: Անմասն չի մնալու նաև զբոսաշրջության ոլորտը: Համայնքում ստեղծվելու են անհրաժեշտ ենթակառուցվածքներ՝ ագրոզբոսաշրջության զարգացման համար:
Վահրամ Խաչատրյանը, որպես ծնունդով արմավիրցի, շատ կարևոր է համարում ներդնել իր հնարավորությունների առավելագույնը զարգացած ու բարեկեցիկ, հարմարավետ ու բարեկարգ համայնք ունենալու համար: Նրա հավաստմամբ՝ իրենց թիմը վճռականորեն է տրամադրված լուծել համայնքի առջև ծառացած խնդիրները, բարձրացնել համայնքի կողմից բնակչությանը մատուցվող ծառայությունների որակը, արագորեն լուծել կենսական նշանակություն ունեցող խնդիրները, խթանել գյուղատնտեսությունը և ձեռնարկատւիրական գործունեությունը: «Մեր նպատակն է համայնքի կառավարման համակարգում նոր մոտեցումներ ու սկզբունքներ ցուցաբերելով, աշխատասիրությամբ ու հետևողականությամբ ապահովել բոլոր բնակավայրերի հավասարաչափ և կայուն զարգացումը»,– ասում է նա:
