Գյումրեցի ծանրորդներ Վարազդատ Լալայանն աշխարհի փոխչեմպիոն է դարձել, Գոռ Մինասյանը նվաճել է բրոնզե մեդալ
Ուզբեկստանի մայրաքաղաք Տաշքենդում ավարտված Ծանրամարտի աշխարհի առաջնության գերծանր քաշային կարգում հիմնական պայքար է ծավալվել Վրաստանի ներկայացուցիչ, Օլիմպիական խաղերի կրկնակի, աշխարհի քառակի չեմպիոն Լաշա Տալախաձեի և Հայաստանից Օլիմպիական խաղերի փոխչեմպիոն Գոռ Մինասյանի և Վարազդատ Լալայանի միջև:
Գերծանր քաշում Գոռ Մինասյանն առաջին մոտեցմամբ բարձրացրել է 205 կգ, սակայն երկու փորձից գլխավերևում չի ֆիքսել 213 կգ-ն:
Հրում վարժությունում Մինասյանը հաջորդաբար հրել է 240 կգ, 243 կգ, սակայն չի բարձրացրել 253 կգ: Երկամարտի 448 կգ արդյունքով Մինասյանը դարձել է աշխարհի առաջնության բրոնզե մեդալակիր:
Հայաստանի մյուս ներկայացուցիչ Վարազդատ Լալայանը նախ պոկել է 202 կգ, հետո 207 կգ, վերջում 211 կգ: Այս ձևում Լալայանը դարձել է փոքր արծաթե մեդալակիր: Հրում վարժության ժամանակ սկզբում չի բարձրացրել 240 կգ, սակայն հաջորդիվ գլխավերևում պահել է 242 կգ:
Լալայանը վերջին մոտեցմամբ բարձրացրել է 246 կգ և երկամարտի 457 կգ արդյունքով դարձել աշխարհի առաջնության արծաթե մեդալակիր: Այս քաշում աշխարհի չեմպիոնի տիտղոսը վաստակել է Վրաստանի ներկայացուցիչ Լաշա Տալախաձեն:
