Թուրքիայի նախագահ Ռեջեփ Թայիփ Էրդողանը հայտարարել է, որ Ռուսաստանի նախագահ Վլադիմիր Պուտինն անկեղծ է եղել, երբ խոսել է ուկրաինական ճգնաժամի շուրջ Ստամբուլի բանակցությունների ճակատագրի մասին։
Այս մասին նա լրագրողներին ասել է Եգիպտոսից վերադառնալիս՝ ինքնաթիռում տված ասուլիսում։
«Անկեղծ կլինեմ, պարոն Պուտինի այդ հայտարարություններում անկեղծություն կա։ Ստամբուլի գործընթացի շրջանակներում կայացած հանդիպումներում մենք ձեռնարկել ենք բոլոր հնարավոր անկեղծ քայլերը։
Նախարարները հանդիպումներ են ունեցել ռուսական կողմի հետ։ Մենք աշխատեցինք արդյունքների վրա կենտրոնանալով, բայց չկարողացանք խաղաղություն հաստատել։ Մենք չենք կարող հրաժարվել դրանից միայն այն պատճառով, որ այն ժամանակ չկարողացանք արդյունքի հասնել։ Մենք չենք հրաժարվի խաղաղության մեր ցանկությունից և կշարունակենք անել հնարավոր ամեն բան՝ խաղաղություն ապահովելու համար»,- Էրդողանի խոսքը մեջբերում է TRT-ն։
Թուրք առաջնորդը հավելել է, որ ինքը «համատեղ աշխատել է [Ռուսաստանի Դաշնության հետ] և շարունակել է ջանքեր գործադրել, քանի դեռ Մեծ Բրիտանիայի նախկին վարչապետ Բորիս Ջոնսոնը չի հրաժարվել խաղաղության ջանքերից»։
«Վերջերս մեզ մոտ եկավ Մեծ Բրիտանիայի արտաքին գործերի նախարար Դևիդ Քեմերոնը, և մենք նրա հետ քննարկեցինք այդ հարցերը։ Եթե պարոն Պուտինը մեզ մանրամասն մտքերի փոխանակում ունենա, կամ Ռուսաստանից համապատասխան նախարարներ գան, մենք նրանց հետ միասին կղեկավարենք այս գործընթացը և կփորձենք արդյունքի հասնել»,- ասել է թուրք առաջնորդը։