Թեժ բախումներ Վրաստանում
Վրացի ակտիվիստները ցույց են անցկացնում Կախեթիի շրջանի «Կվարելի» հյուրանոցային համալիրի մոտ, հայտնում է «Դոժդ» հեռուստաալիքը։
Պատճառը լրատվամիջոցներում հրապարակված տեղեկությունն էր, որ այս հյուրանոցում է իջեւանել ՌԴ ԱԳ նախարար Սերգեյ Լավրովի դուստրը՝ Եկատերինա Վինոկուրովան (ամուսնական ազգանունն է)։
Հայտնի է, որ Լավրովի ընտանիքի անդամները ներառված են ԵՄ-ի և ԱՄՆ-ի պատժամիջոցների ցուցակներում։
Վրացական լրատվամիջոցների փոխանցմամբ՝ Վինոկուրովան եկել է ամուսնու եղբոր հարսանիքին, որը կանցկացվի Kvareli Lake Resort հանգստավայրում։
Վրաստանի Առաջին ալիքը հայտնել է, որ իրավապահները «Կվարելի լիճ» հյուրանոցի հարակից տարածքից բերման են ենթարկել մի քանի ակտիվիստների, որոնք բողոքի ակցիա էին անցկացնում։ Առաջին ալիքի լրագրողի փոխանցմամբ՝ իրավիճակը տեղում սրվել է այն բանից հետո, երբ միկրոավտոբուսը դուրս է եկել հյուրանոցից։
Ցուցարարները պնդում են, որ ավտբոսում եղել են ՌԴ-ից ժամանած հյուրերը։ Նրանք ձվեր են նետել մեքենայի վրա, որին հաջորդել է բանավոր փոխհրաձգություն իրավապահների և ցուցարարների միջև։ Հյուրանոցի դիմաց ակցիան իրականացնում են «Միացյալ ազգային շարժման» ակտիվիստները։
Նովոստի-Գրուզիա պորտալը գրում է, որ հյուրանոցի մոտ ընդհարում է ոստիկանների և ցուցարարների միջև։ Տեղում մոբիլիզացվել են ոստիկանության աշխատակիցներ ու հատուկ ջոկատայիններ, շարունակում են ժամանել լրացուցիչ ուժեր։ Ներքին գործերի նախարարությունը հաստատել է 16 անձի ձերբակալումը։ Ցուցարարներն ասում են, որ ոստիկանները խլում են իրենց բջջային հեռախոսները, որոնց մեջ առկա են տեսանյութեր, թե ինչպես է Ռուսաստանից ժամանած հյուրերի շարասյունը ժամանում հյուրանոց։
Վրացական լրատվամիջոցների հաղորդմամբ՝ ռուս գործարար Ալեքսանդր Վինոկուրովի եղբայրը, ով ՌԴ արտգործնախարարի փեսան է, նախապես Թբիլիսիում ստորագրել է իր ընտրյալի հետ։ Հյուրանոցից սկզբում հերքեցին, որ իրենք հյուրընկալում են ՌԴ արտգործնախարարի ընտանիքի անդամներին, սակայն հետո դադարեցին պատասխանել լրագրողների հարցերին։
