Լիտվայի նախագահը ծննդյան օրվա առթիվ շնորհավորել է Փաշինյանին ու շուտափույթ ապաքինում մաղթել
ԵՐԵՎԱՆ, 1 ՀՈՒՆԻՍԻ, ԱՐՄԵՆՊՐԵՍ: Լիտվայի Հանրապետության նախագահ Գիտանաս Նաուսեդան ծննդյան օրվա առթիվ շնորհավորել է ՀՀ վարչապետ Նիկոլ Փաշինյանին ու շուտափույթ ապաքինում մաղթել կորոնավիրուսից: «Արմենպրես»-ի փոխանցմամբ՝ այս մասին Նաուսեդան գրել է «Թվիթեր»-ի իր միկրոբլոգում:
«Հայաստանի Հանրապետության հարգելի վարչապետ Նիկոլ Փաշինյան, իմ և իմ կնոջ անունից շնորհավորում եմ ձեր ծննդյան տարեդարձը: Լիտվան ձեր և ձեր ամբողջ ընտանիքի կողքին է կորոնավիրուսի դեմ պայքարում: Մաղթում ենք ձեզ շուտափույթ ապաքինում»,- գրել է Լիտվայի նախագահը:
Հունիսի 1-ին «Ֆեյսբուք»-ի իր էջի ուղիղ եթերում ՀՀ վարչապետ Նիկոլ Փաշինյանը հայտնել է, որ ինքն ու իր ընտանիքը վարակվել են կորոնավիրուսով, նրանց թեստերի պատասխանները դրական են: Վարչապետի ընտանիքը մեկուսացած է կառավարական առանձնատանը, Փաշինյանն աշխատանքը կիրականացնի առանձնատնից:
