Ռումինիայում ընթացող ազատ ոճի ըմբշամարտի Եվրոպայի Մ23 առաջնությունում նախորդը օրը պարտված Էդիկ Հարությունյանն ու Նարեկ Գրիգորյանը կպայքարեն բրոնզե մեդալի համար: Երկու ըմբիշների մրցակիցներն էլ Ադրբեջանի ներկայացուցիչներն են: Մրցումային օրվա երրորդ հայ-ադրբեջանական դիմակայությունը 70 կգ քաշային կարգում Հայկ Պապիկյան – Մագոմեդ Բաշիր Խանիեւն եզրափակիչ գոտեմարտն է:
57 կգ քաշային Էդիկ Հարությունյանը, որը Եվրոպայի առաջնության առաջին մրցումային օրը պարտվել էր մենկարկում, բրոնզե մեդալի համար պայքարելու հնարավորություն է ստացել, քանի որ նրան հաղթած թուրք ըմբիշը դուրս էր եկել եզրափակիչ:
Էդիկ Հարությունյանը միակ սփոփիչ գոտեմարտում 8:0 հաշվով հաղթել է լեհ Ռաֆալ Ռոման Ժեւչին: Բրոնզե մեդալի համար գոտեմարտում նրա մրցակիցը կլինի Ադրբեջանը ներկայացնող Նուրադին Նովրուզովը:
79 կգ Նարեկ Գրիգորյանին քառորդ եզրափակիչում հաղթած հույն ըմբիշը եւս եզրափակիչում է եւ Գրիգորյանին բրոնզե մեդալի համար գոտեմարտելու հնարավորություն է տվել: Մրցակիցը Ադրբեջանը ներկայացնող Սաբուհի Ամիրասլանովն է:
Եվրոպայի Մ23 առաջնության երկրորդ մրցումային օրը պայքարի մեջ մտած Հայաստանի 5 ներկայացուցիչներից 2-ը դուրս են եկել կիսաեզրափակիչ:
61 կգ քաշային Մեժլում Մեժլումյանը որակավորման փուլում 10:0 հաշվով հաղթել է Ֆրանսիան ներկայացնող Ադամ Բիբուլատովին, քառորդ եզրափակիչում վստահ հաղթանակ տարել ռումինացի Դանիել Ռիտերի նկատմամբ կրկին 10:0 հաշվով: Կիսաեզրափակիչում մրցակիցը կլինի իտալացի Սիմոն Վինչենցո Պիրոդուն:
86 կգ քաշային Կյազ Իբոյանը նույնպես կիսաեզրափակիչում է: Նա պայքարը սկսել է որակավորման փուլից, որտեղ 4:2 հաշվով հաղթել է Մոլդովայի ներկայացուցիչ Իվան Իչիզլիին, քառորդ եզրափակիչում 7:5 հաշվով պարտության է մատնել Ադրբեջանը ներկայացնող Ֆարիդ Ջաբարովին:
Կիսաեզրափակիչում Կնյազ Իբոյանը ուժերը կչափի թուրք Իսմայիլ Կուկուկսոլակի հետ:
Հայաստանի մյուս ներկայացուցիչներ Մենուա Յարիբեկյանը (74 կգ), Սերգեյ Սարգսյանն (92 կգ) եւ Մարտին Սիմոնյանը (125 կգ ) պարտվել են մեկնարկում:
Երեկոյան մրցահերթում Հաբեթնակ Կուրղինյանի գլխավորած հավաքականից ոսկե մեդալի համար կպայքարի Հայկ Պապիկյանը: Մրցակիցը Ադրբեջանի ներկայացուցիչ Մագոմեդ Բաշիր Խանիեւն է: