ՀԱՄԱԽՄԲՎԱԾ ՈՒ ՄԻԱՍՆԱԿԱՆ՝ Ի ՇԱՀ ՀԱՄԱՅՆՔԻ
Ստորև ներկայացնում ենք մեր հարցազրույցը Արարատի մարզի Արտաշատ համայնքի ղեկավար Կարեն Բենամինյանի հետ՝ կապված ավագանու նիստերի չեղարկման հետ:
– Պարոն Բենամինյան, որո՞նք են այն խնդիրները՝ կապված համայնքի ավագանիների հետ, որոնց պատճառով չեղարկվել են նիստերը, ինչն էլ իր հերթին պատճառ է հանդիսանում համայնքում կատարվելիք աշխատանքների չեղարկմանը կամ հետաձգմանը։
– Մայիսի երեքին նորից արտահերթ նիստ էր նշանակված, որի ընթացքում պետք է քննարկվեին համայնքի համար շատ կարևոր հարցեր: Մասնավորապես՝ սուբվենցիայի ծրագիրը, ըստ որի կառավարության կողմից պետք է հատկացվեր 45%, և 55% էլ իր միջոցներից հատկացներ համայնքը, որով նախատեսվել էր մի քանի բազմաբնակարան շենքերի բակերի, ինչպես նաև Շահումյան, Մարքս փողոցները հատող հատվածի ասֆալտապատման աշխատանքները։ Չգիտեմ ինչ պատճառներով՝ ավագանու չորս անդամ չներկայացավ նիստին, քվորումը չապահովվեց, և նիստը չկայացավ: Դա արդեն երկրորդ նիստն է, որ քվորումը չապահովելու պատճառով չի կայանում: Ավագանու մյուս ներկա անդամները հանդես եկան հրաժարական տալու հայտարարությամբ, քանի որ կարծում են, որ նման ձևաչափով ո՛չ կարող են աշխատել, ո՛չ էլ համայնքի խնդիրներին լուծում տալ։ Ավագանու մի քանի անդամների անձնական պատճառաբանություններով նիստերին չներկայանալը և ավագանու հարցերին ճիշտ գնահատական չտալը հանգեցրեց նրան, որ մնացածը հրաժարական ներկայացրին։
– Իսկ ի՞նչ եք կարծում, ավագանիների կողմից այսպիսի իրավիճակ ստեղծելու պատճառը ո՞րն է:
– Կարծում եմ՝ կա՛մ ուղղորդող կա, կա՛մ անձնական շահ։ Եթե ավագանու անդամները հարց ունեն և մտածում են քաղաքի մասին, քանի որ ընտրված են ժողովրդի կողմից, պարտավոր են ներկա գտնվել ավագանու նիստերին, քննարկել հարցերը, ճիշտ լուծումներ տալ, այսինքն՝ առողջ մթնոլորտում պետք է աշխատեն: Մինչդեռ ասում են՝ այս հարցը մեզ խանգարում է, մենք չենք կարող մասնակցել, հողի վաճառք քաղաքում պետք է չանենք, կամ, չգիտեմ, կառուցվածքային փոփոխություն անենք համայնքապետարանում: Դա համայնքի ղեկավարի լիազորությունների ներքո է: Ավագանու վերջին նիստին, նաև քաղաքի մասին մտածելով, ներառված էր տասը բազմաբնակարան շենքերի բակային մասի և երեսուն տարի չասֆալտապատված մի մեծ փողոցի ասֆալտապատման շատ կարևոր ծրագիրը: Ես գնացի այն քայլին, որ նեկայացնեմ նաև Արտաշատի քաղաքապետարանի աշխատակազմի կառուցվածքային փոփոխություն, բայց դա էլ չօգնեց, որ մեր ավագանինները մասնակցեն նիստին։
– Պարոն Բենամինյան, մինչ ավագանու արտահերթ ընտրությունները կայանալը ինչպե՞ս պետք է իրականացվեն քաղաքի ծրագրերը: Չէ՞ որ դրանք կանգ են առել։
– Ըստ օրենքի՝ համայնքում իրականացվող աշխատանքների համար պարտադիր պետք է լինի ավագանու որոշումը, բայց ես կգտնեմ այլ ճանապարհ՝ այդ հարցին լուծում տալու, իհարկե, օրենքի շրջանակներում: Հնարավորինս սեղմ ժամկետում լուծումներ կգտնենք և կգնանք առաջ: Ես չեմ թողնի, որ մեր համայնքի խնդիրները մնան օդում։
– Պարոն Բենամինյան, Ձեզ նաև մեղադրում են, որ Ձեր ղեկավարման ընթացքում համայնքում որևէ դրական տեղաշարժ չի եղել։
– Իմ ընտրվելուց հետո համայնքի սեփական եկամուտներն աճել են 58 %-ով՝ 248 մլն դրամից դառնալով 410 մլն դրամ: Մի՞թե դա դրական տեղաշարժ և աշխատանքի արդյունք չէ։
Մեր աշխատանքների ուղղվածությունն այն է, որ համայքում կարողանանք ունենալ մեծ գումարների մուտք և համայնքը զարգացնենք սեփական եկամուտներով: Այսինքն՝ եթե այսօր համայնքը չունենա ֆինանսական միջոցներ, չի կարող որևէ դրական շարժ կատարել: Սեփական եկամուտների աճով չենք սահմանփակվում, նշված աճով մենք դեռ անելիքներ ունենք և առաջ ենք գնալու՝ մեր սեփական եկամուտները մեծացնելով: Նաև տարբեր ծրագրեր ունենք, որոնցով կթեթևացնենք համայնքի հոգսերը։ Համայնքի հոգսերը մի քիչ շատ են, քանի որ ունենք տասնհինգ համայնքային ոչ առևտրային կազմակերպություններ: Համայնքի ծանրաբեռնվածությունը մեծ է, քանի որ մարզկենտրոն է: Մեր ֆինանսական միջոցների մեծ մասը գնում է աշխատավարձի, պահպանման, ջեռուցման, ինչպես նաև լուսավորության բոլոր այդ ուղղություններով: Այսինքն՝ համայնքը պետք է ունենա մեծ միջոցներ, որպեսզի կարողանանք գլոբալ մեծ խնդիրներ լուծել։
– Համայնքապետարանի կոլեկտիվի բարոյահոգեբանական մթնոլորտը ինչպիսի՞ն է։
– Նորմալ է, բոլորն էլ աշխատում են, կատարում իրենց պարտականությունները: Ես ասել եմ՝ չաշխատող մարդը տեղ չունի համայնքապետարանում: Մենք համայնքային ծառայողներ ենք և ծառայելու ենք մեր համայնքին: Թիմային աշխատանքի մասին է վկայում մեր սեփական եկամուտների աճը։
Խնդիրներ շատ կան համայնքում, որոնք մեր ուշադրության կենտրոնում են: Բայց դրանց համար ժամանակ է պետք, բոլոր խնդիրներին միանգամից լուծումներ չեն կարող տրվել։
Կոչով դիմում եմ մեր բնակիչներին և մեկ անգամ ևս տեղեկացնում, որ Արտաշատի համայնքապետարանը, հանձինս համայնքապետի, պատրաստակամ է յուրաքանչյուր հարց քննարկել առողջ մթնոլորտում, կլոր սեղանի շուրջ և լուծումներ գտնել համատեղ։ Ավագանու անդամները, որոնք ընտրվում են, պարտավոր են հաշվետու լինել իրենց կատարած աշխատանքների համար: Ցեխ շպրտելով՝ ոչ ոք արդյունքի չի հասնի, մինչդեռ կտուժի համայնքը և համայնքի բնակիչները: Պետք է լինել համախմբված ու միասնական։
– Պարոն Բենամինյան, Ձեր ղեկավարման 2 տարիների ընթացքում համայնքում ի՞նչ գլոբալ աշխատանքներ են կատարվել։
– Նախկինում ունեինք հուղարկավորման ՀՕԱԿ, որը հուղարկավորման համար տարածք էր տրամադրում: Իմ ընտրվելուց հետո դադարեցրել եմ այդ ՀՕԱկ-ի գործունեությունը, համայնքը ձեռք է բերել հողատարածք, մեր համայնքի բնակիչներին տրամադրվում է մինչև 12 մետր անվճար, իսկ 12-ին պլույս 9 քմ, որը լինում է ընտանեկան գերզմանատեղ, վճարում են 32 հազար դրամ: Սա համայնքի համար կարևոր խնդիր էր: Որոշեցի իմ ընտվելուց հետո այդ քայլին գնալ: Չեմ ցանկանում անդրադառնալ, թե նախկինում ինչ ձևաչափով են հատկացրել, կարծում եմ՝ մեր քաղաքացիները գնահատականը կտան։
Ստեղծել ենք Բանկ կոմունալ սպասարկման ՀՕԱԿ-ը, որը զբաղվում է բազաբնակարան շենքերի, ջրագծերի, կոյուղագծերի, տանիքների հետ կապված խնդիրներով։
Համայնքում ունենք 135 բազմաբնակարան շենք, որոնցից 65-ում խնդիր ունենք:
Միանգամից չենք կարող բոլորը վերանոգել, բայց այս ՀՕԱԿ-ի միջոցներով ամեն տարի մասնակի վերանորոգում ենք: Այս պահի դրությամբ մեծամասամբ խնդիրները լուծված են: Սակայն պետք է ասել, որ դա ժամանակավոր բնույթ է կրում, քանի որ տարիների ընթացքում խնդիրները նորից ի հայտ են գալիս։
2018 թ. իրականացրել ենք մի քանի բազաբնակարան շենքերի բակերի ասֆալտապտում՝ Իսակով 1, Իսակով 101/1, Իսակով 99, Իսակով 74/1, Շահումյան 31, 33: Այս տարի էլ նախատեսել ենք ևս 10 բազմաբնակարան շենքերի բակերի ասֆալտապատում, որը պետք է իրականացնեինք սուբվենցիոն ծրագրով: Իհարկե պարզ է, որ միայն համայնքի միջոցներով ավելի քիչ ծավալի աշխատանք կկարողանանք կատարել: Ինչպես նշել էի, այս աշխատանքների իրականցումը խաթարեց ավագանին, բայց ոչինչ, լուծում կգտնենք։
Նաև նշեմ, որ բոլոր բազմաբնակարան շենքերի տարածքում լուսավորության աշխատանքներն ավարտված են: Մնացել է սեփական սեկտորի հատվածներում լուսավորության անցկացումը, դա էլ փուլ առ փուլ կիրականցնենք։ Հույս ունենք բյուջեի խնայողություն կատարելով՝ մյուս տարի ավելի շատ ծրագրեր կյանքի կոչել։
Ամեն վայրկյան, գիշեր-ցերեկ ծառայելու ենք, ես համայնքի ղեկավար եմ դարձել և համայքին միայն օգուտ պետք է տամ, թեկուզ ի վնաս ինձ։
