Հովհաննես Ազոյանը կմասնակցի Երևանի ավագանու ընտրություններին
Արդեն 3 կուսակցություն Կենտրոնական ընտրական հանձնաժողով է ներկայացրել Երևանի ավագանու ընտրություններում առաջադրման համար անհրաժեշտ փաստաթղթերը։
Հայաստանի Եվրոպական կուսակցության նախընտրական ցուցակը գլխավորում է Տիգրան Խզմալյանը։ Առաջին տասնյակում ընդգրկված են
- Արամ Գևորգյան
- Գեղեցիկ Նազարյան
- Հովհաննես Ազոյան
- Լևոն Հունանյան
- Անահիտ Մկրտչյան
- Արսեն Զաքարյան
- Ռուբեն Շուխյան
- Մարիամ Մինասյան
- Զոհրաբ Մենեդյան։
Aysor.am-ին հայտնի դարձավ, որ ցուցակի 4-րդ համարի դեպքում խոսքը դերասան Հովհաննես Ազոյանի մասին է: Կուսակցության ղեկավար Տիգրան Խզմալյանը մեզ հետ զրույցում նշեց, որ Հովհաննես Ազոյանը ցանկություն է հայտնել իրենց կուսակցությունով մասնակցել ընտրություններին. «Ցուցակի 30 տոկոսը կարող են լինել անկուսակցականներ, և նա նրանցից մեկն է: Մենք ծանոթ էինք իրար, և այդպես պայմանավորվեցինք»։
Հարցին, թե իրենց չի՞ կաշկանդում, որ նա նախկինում ՔՊ-ի աջակից է եղել՝ Խզմալյանը պատասխանեց.«Նախկինում ինչ եղել է, դա արդեն պետք է թողնել անցյալում, կարևորը, թե ինչ է լինելու ապագայում»։
Հիշեցնենք, որ Երևանի ավագանու հերթական ընտրության քվեարկությունը կանցկացվի 2023 թվականի սեպտեմբերի 17-ին։
