ՆԺԱՐԻՆ ՎԱՂՎԱ ՕՐՆ Է

Սեպտեմբերի 25-ին Սյունիքի մարզի Սիսիան համայնքում կայանալու են ՏԻՄ համամասնական ընտրություններ, որտեղ առաջադրվել է 7 քաղաքական ուժ:  «Ապրելու երկիր» կուսակցության ավագանու ցուցակը գլխավորում է Արա Զաքարյանը, որի հետ հարցազրույցը ներկայացնում ենք ստորև:

– Պարոն Զաքարյան, ինչո՞ւ որոշեցիք առաջադրել Ձեր թեկնածությունը:

– Առաջադրման նպատակը Սիսիանի գյուղերում այսօր առկա անմխիթար վիճակն է, որ  առաջացել է կենսական նշանակության խնդիրների պատճառով: Ես՝ որպես Սիսիանի քաղաքացի, որպես իմ բնակավայրով մտահոգ մարդ, տեսնում եմ, որ սայլը տեղից չի շարժվել: Ինչի հետևանքով էլ բնակիչներն այլևս դրականի ոչ մի ակնկալիք, սպասելիք չունեն: Այցելում ես գյուղական համայնք, փորձում ես խոսել ծրագրերից, մտահղացումներից, մինչդեռ ուզում են քեզ լռեցնել, որովհետև քեզ նման հարյուր հոգու արդեն տեսել են ու այլևս չեն հավատում: Շատ բարդ է զրույցներով հասնել նրան, որ գոնե սկսեն լսել: Պիտի կարողանաս մարդու մեջ հույս ու հավատ արթնացնել, որ փորձի լսել քեզ, ու դեռ պարզ չէ՝ լսելուց հետո կհավատա՞, թե՞ ոչ: Այս ամենի պատճառը մեր շուրջը կատարվող երևույթներն են: Այսօր՝ 21-րդ դարում, խնդիրներ կան, որոնք ուղղակի ծիծաղելի են, կամ, ավելի ճիշտ՝ լացելու: Մեր կողքին ապրում են մարդիկ, որոնք մի բաժակ խմելու ջուր կամ մի բաժակ թեյ իրենց երեխային տալուց ընդհանրապես երաշխիք չունեն՝ այն երեխային օգո՞ւտ կտա, թե՞ վնաս, որովհետև այդ ջուրը վերցնում են անհայտ ծագման առվակներից: Իմ կարծիքով՝ ամենահասարակից ու ամենակարևորից սկսեցի: Մեր նպատակը մեր համայնքի զարգացումն է:

– Պարոն Զաքարյան, շարունակելով հարցը՝ ինչո՞ւ հենց «Ապրելու երկիր» կուսակցությամբ առաջադրեցիք Ձեր թեկնածությունը ՏԻՄ ընտրություններում։ 

– «Ապրելու երկիր» կուսակցությամբ առաջադրվել եմ իրար հետ քննարկումների արդյունքում: Հասկացա, որ իմ և «Ապրելու երկիր» կուսակցության նախագահ Մանե Թանդիլյանի ու համահիմնադիր Մեսրոպ Առաքելյանի մոտեցումները, տեսակետները խնդիրների լուծման վերաբերյալ, վաղվա օրվա հետ կապված մեր պատկերացումները համընկնում են, ինչպես նաև պատրաստակամություն են հայտնել «Ապրելու երկիր» հիմնադրամով աջակցել Սիսիան համայնքի խնդիրների լուծմանը: Ի դեպ, արդեն իսկ ունենք նախատիպերը ՀՀ-ի տարբեր համայնքներում։ Այս ամենը հաշվի առնելով է որոշում կայացվել, այսինքն՝ այն ամենը, ինչ ուզում ու պատկերացնում եմ, որ պետք է անեմ, նրանք՝ որպես օգնող ձեռք, հաստատ իմ թիկունքին կանգնած կլինեն՝ իրականացնելու համար։

– Պարոն Զաքարյան, ո՞րն է Ձեր ծրագիրը: Համայնքում ի՞նչ խնդիրներ կան, որոնք առաջնային լուծման կարիք ունեն, և ընտրվելու դեպքում առաջին հերթին կանդրադառնաք դրանց:

– Մեր ծրագիրն է՝ զարգացման բյուջե և տարածքային համաչափ զարգացման ապահովում, գյուղատնտեսական և զբոսաշրջային կլաստերի ձևավորում, համայնքի տրանսպորտային ընկերության ստեղծում, մեքենատրակտորային կայանի հիմնում, համայնքի ոռոգման ցանցի ընդլայնում և արդիականացնում, բազմաբնակարան շենքերի տանիքների հիմնանորոգում, համայնքի ճանապարհների բարեկարգում և պահպանություն, ջրամատակարարման և ջրահեռացման ցանցի նորոգում, ապաստարանների նորոգում և կահավորում, համայնքի զբոսաշրջային գոտևորում և զբոսաշրջային գոտիների բարեկարգում, բնակավայրերի կենցաղ-մշակութային սպասարկման հաստատությունների շենքերի հիմնանորոգում, կահավորում և այլն։ Խնդիրները բավականին շատ են, և ըստ առաջնահերթության կանդրադառնանք դրանց լուծմանը:

– Ավագանու համամասնական ցուցակն ի՞նչ սկզբունքով եք ձևավորել, ինչո՞վ եք առաջնորդվել ընտրություն կատարելիս: Ովքե՞ր են Ձեր թիմում, Ձեր կողքին։

– Իմ թիմը հիմնականում ձևավորվել է մեր շրջապատից: Մեզանից ոչ ոք կյանքի ոչ մի փուլում քաղաքական գործընթացների մեջ չի եղել: Ես եմ եղել ավագանու անդամ, այն էլ՝ առանց քաղաքական թիմի: Մեր թիմում ընդգրկված են այնպիսի մարդիկ, որոնք իրենց ոլորտներում հաջողություն են ունեցել: Օրինակ՝ մեր ավագանու երկրորդ համարը մինչև վերջերս Կենտրոնական բանկի Սիսիանի դրամատան ղեկավարն էր. մի քանի օր առաջ է դիմում գրել, ազատվել աշխատանքից, որպեսզի միանա մեր թիմին՝ վստահ լինելով մեր հաղթանակին: Երրորդ համարը Իսկուհի Բաղդասարյանն է, որն աշխատել է ՄԱԿ-ում: Մի խոսքով, մեր թիմը ձևավորվել է այնպիսի անձանցից, որոնք իրենց գիտելիքները, ներուժը պիտի ծառայեցնեն համայնքի շահերին:

Ընտրվելուց հետո ունեմ իմ որդեգրած ոճը, այսինքն՝ դեմ եմ ծանոթ-բարկամ սկզբունքին: Ճիշտ է, հիմա իմ ասածը կարող է ստանդարտ տեքստ թվալ, որովհետև ընտրապայքարի ընթացքում բոլորն էլ այդպես են ասում, բայց, վստահեցնում եմ, հենց այդ կարծրատիպն ենք կոտրելու. ոչ թե ինչ-որ մեկին ծանոթով խնդրեն ընդունել աշխատանքի, այլ՝ հակառակը, եթե տեսնենք, որ տվյալ մարդու գիտելիքները, աշխատանքային հմտությունները կարող ենք ի շահ համայնքի օգտագործել, մենք ենք խնդրելու, համոզելու: Թեև կան հաստիքներ՝ ցածր աշխատավարձով, այնուամենայնիվ, պետք է կարողանանք կրթություն, աշխատանքային փորձ ունեցողներին՝ լավագույն կադրերին, համոզել աշխատել տվյալ հաստիքով, ապա՝ արդյունավետ և համախմբված աշխատելու դեպքում նաև աշխատավարձների հարցը վերանայել, որպեսզի նորմալ մասնագետների ընդգրկենք:

– Սկսվել է նախընտրական փուլը. ինչպե՞ս է այն ընթանում, համայնքում ինչպիսի՞ն է մթնոլորտը, թշնամանք կամ ճնշումներ արդյոք նկատվո՞ւմ է մրցակիցների կողմից։

– Կոնկրետ մեր մասով լարվածություն չկա և չի լինի: Թեև ճնշումներ կան։Սակայն մեր թիմը այնպիսի մարդկանցով է համալրված, որ ոչ ոք չի ընկճվում ու չի հանձնվում, որովհետև մենք գիտենք՝ ինչի համար ենք պայքարում: Մեր պայքարը ինքնանպատակ չէ: Մենք 43 ավագանու թեկնածու ունենք, որոնցից ոչ ոք չի լուծում պարզապես ավագանի ընտրվելու խնդիր:

Հավելեմ, որ Սիսիանը Հայաստանի ամենամեծ համայնքն է տարածքով, աշխարհագրական դիրքով: Իսկ դա ենթադրում է կրկանկի, եռակի բարդություն ցանկացած աշխատանքում: Օրինակ, կա գյուղ, որը 4 տնտեսություն ունի և նախորդ գյուղից գտնվում է 15-20 կմ հեռավորության վրա, այսինքն՝ այստեղ ասֆալտպատման, ջրագիծ կառուցելու համար լուրջ ծախսեր են պահանջվում: Բայց այս խնդրի մասին խոսենք նաև հակառակ կողմից: Իմ պատկերացմամբ՝ նմանատիպ համայնքներում  ճանապարհաշինությունը և ջրագծերի կառուցումը պետք է իրականացվի ռազմավարական ծրագրերով:

– Պարոն Զաքարյան, Սիսիան համայնքի ավագանու ընտրություններին առաջադրվել է ևս 6 քաղաքական ուժ: Ինչպե՞ս եք գնահատում Ձեր  ընտրվելու հնարավորությունները:

– Ես չեմ ուզում որևէ մեկին թերագնահատել: Բոլորն էլ ինչ-որ առումով մրցակից են, մանավանդ, որ համամասնական ընտրակարգով են տեղի ունենալու ընտրությունները: Յուրաքանչյուր քաղաքական թիմ  ավագանու մինչև 63 թեկնածու կարող  է առաջադրել: Ուստի,  առաջադրված ցանկացած քաղաքական ուժ ինչ-որ առումով մրցակից է, մանավանդ եթե հաշվի առնենք յուրաքանչյուր թեկնածուի ծանոթ-բարեկամի առկայությունը, ինչն արդեն խնդիր է:

Քարոզարշավի ընթացքում կարևորում ենք այն, որ բնակիչները ընտրություն կատարեն մի սկզբունքով՝ հավատացած լինելով, թե որ ուժին են ընտրում: Քարոզարշավի ժամանակ դիմելով բնակչությանը՝ ես ոչ թե ասում եմ ձայն տալ ինձ, մեր կուսակցությանը, այլ՝ ներկայացնում եմ մեր ծրագրերը և ապա խնդրանքով, կոչով հորդորում եմ քվեաթերթիկները վերցնելիս հաշվի առնել տվյալ ցուցակի առաջին համարին, թիմին, այդ թիմի ետևում կանգնած ուժին՝ համոզված լինելով, որ վերջինս, ղեկավարելով համայնքը, կարող է լուծել համայնքում առկա խնդիրները: Ահա այս տրամաբանությամբ մասնակցել ընտրություններին, և ոչ թե ընտրել այս կամ այն ուժին, որովհետև բարեկամս նրանց ցուցակում է: Չի կարելի «խաթրով» ընտրություն կատարել, որովհետև նժարին սեփական կյանքդ է, համայնքիդ խնդիրները: Ընտրիր այն թիմին, որն ի զորու է լուծել խնդիրները:

– Պարոն Զաքարյան, համամասնական ընտրակարգով բացարձակ մեծամասնություն չլինելու դեպքում համայնքի ղեկավարն ընտրվելու է կոալիցիոն տարբերակով: Այդ պարագայում կդիմե՞ք համագործակցության Ձեզ մրցակից քաղաքական ուժերի հետ:

– Նախ ասեմ, որ մենք աներկբա գնում ենք բացարձակ հաղթանակի հետևից: Իմ և մեր թիմի առջև դրված է ամենաքիչը 11 մանդատի ձեռք բերման խնդիր, որը 50%+ դեպքում կարող ենք ունենալ: Իսկ ինչ վերաբերում է կոալիցիա կազմելուն, անկեղծ ասած՝ այդ մասին ո՛չ մտածել ենք, ո՛չ էլ որևէ քննարկում ենք ունեցել: Առայժմ հետևում ենք մյուս թիմերին, նրանց մոտեցումներին, ծրագրերին, նրանց տեսլականին, ապա ըստ այդմ էլ կտեսնենք ում հետ համագործակցության ինչ-որ եզրեր գտնել: Ամեն դեպքում, դրա մասին կխոսենք սեպտեմբերի 26-ին, եթե չհասնենք մեր ուզած արդյունքին:

– Ի՞նչ եք կարծում, կլինե՞ն արդար և թափանցիկ ընտրություններ։

– Կարծում եմ՝ այո: Թեև չեմ բացառում, ինչպես նաև վերևում նշեցի, որ ընտրական այս գործընթացի մեջ կարող են առաջանալ մանր-մունր տեխնիկական հարցեր՝ «ճնշումների» տեսքով։

– Եվ վերջում՝ ի՞նչ կհղեք Ձեր համայնքի բնակիչներին՝ ընտրողներին։

– Կխնդրեի, որ ընտրություն կատարելիս քվեախցիկում ընդամենը ինքն իրեն հաշիվ տա, հիշի իր խնդիրները, դրանք լուծելու ուղղությամբ համեմատություն անցկացնի թեկնածուների միջև, և ապա միայն ընտրություն կատարի: Կցանկանայի, որ ընտրությունը կատարվի բացառապես այն սկզբունքով, որ մարդն ինքն իր մեջ վստահ լինի՝ իր ընտրած կուսակցությունը կամ իր ընտրած թեկնածուն, առաջնորդը կանի այն ամենը, ինչ պետք է: