Նոր մոտեցումներով դեպի զարգացում
Հարցազրույց ՀՀ Կոտայքի մարզի նորանշանակ մարզպետ Ահարոն Սահակյանի հետ
– Պարոն Սահակյան, ի՞նչ աշխատանքներ են կատարվում Կոտայքի մարզում և ինչպիսի՞ ծրագրեր են կյանքի կոչվում։
– Այս պահին հիմնականում սուբվենցիոն ծրագրերով ենք զբաղված: Ունենք ծրագրեր, որոնց իրագործումը սկսել ենք դեռևս 2019 թ-ից, սակայն կորոնավիրուսի համաճարակը, 44-օրյա պատերազմը փոքր-ինչ երկարաձգեցին շինարարական աշխատանքները: Գրեթե բոլոր համայնքներում ունենք ծրագրեր, բոլոր համայնքներում էլ ակտիվ շինարարական աշխատանքներ են ընթանում: Ընդգրկված են տարբեր ոլորտներ, հիմնականում՝ մանկապարտեզներ, մշակույթի օջախներ, ջրագծեր, ճանպարհներ և այլն: Այս ընթացքում հասցրել եմ ծանոթանալ համայնքներում իրականացվող որոշ ծրագրերի հետ: Ամենակարևորը՝ շատ որակյալ աշխատանքներ են կատարվում: Ճիշտ է ժամկետներից կարող է ուշանան, բայց, ամենակարևորը, որ որակյալ աշխատանքներ իրականցվեն։
2021 թ.-ի համար բավականին մեծ ծրագրեր ունենք: Կառավարության միջգերատեսչական հանձնաժողովի կողմից արդեն ունենք մարզի շուրջ 30 համայնքների սոցիալական և տնտեսական զարգացմանն ուղղված 89 հաստատված սուբվենցիոն ծրագիր՝ ընդհանուր 6,9 մլրդ. դրամ արժեքով, որը գրեթե 400 մլն դրամով ավելի է անցած տարվա ծրագրերից: Հինգ-վեց համայնքում շինարարական աշխատանքներն արդեն սկսված են: Սա շարունակական է լինելու, չենք սահմանափակվելու ձեռքբերվածով, զարգացնելու ենք համայնքները, հորդորելու ենք, որ տարեցտարի ավելի շատ ծրագրեր ներկայացնեն։
Այսպիսով, պետական աջակցությամբ մեր համայնքներում կիրականացվեն մի շարք աշխատանքներ, մասնավորապես՝ մանկապարտեզներ և խաղահրապարակներ կկառուցվեն, կվերակառուցվեն, կվերանորոգվեն, կկահավորվեն Հրազդան, Աբովյան, Ջրվեժ, Ծաղկաձոր, Մեղրաձոր, Գեղաշեն, Մայակովսկի, Քանաքեռավան համայնքներում, այգիներ, պուրակներ կկառուցվեն, կբարեկարգվեն Հրազդան, Ծաղկաձոր, Նոր Հաճն համայնքներում, կապիտալ կասֆալտապատվեն, կնորոգվեն (սալարկմամբ) շուրջ 20 համայնքների ներհամայնքային ճանապարհահատվածներ, կգազաֆիկացվեն Թեղենիք, Պռոշյան, Գեղաշեն, Մրգաշեն, Քանաքեռավան, Քասախ համայնքների թաղամասեր: Գիշերային լուսավորության համակարգեր կկառուցվեն և կնորոգվեն 13 համայնքներում, խմելու ջրի ջրագծեր, ջրահեռացման և ոռոգման համակարգեր կկառուցվեն, կնորոգվեն Բյուրեղավան, Պռոշյան, Ծաղկաձոր, Եղվարդ, Մեղրաձոր, Ջրվեժ, Գառնի, Քանաքեռավան, Կամարիս, Քասախ համայնքներում: Շուրջ 14 համայնքներում կիրականացվեն բազմաբնակարան շենքերի գույքի նորոգման, հասարակական շենքերի կառուցման, վերանորոգման, համայննքների գլխավոր հատակագծերի կառուցման, մեքենասարքավորումների, տեխնիկայի ձեռքբերման, արևային ֆոտովոլտային կայանների տեղադրման աշխատանքներ::
– Պարոն Սահակյան, արդյոք կա՞ն համայնքներ, որտեղ մանկապարտեզ չկա և կառուցելու կարիք կա։
– Իհարկե, կան այդպիսի համայնքներ: Օրինակ Արամուսը, որը բավականին մեծ համայնք է, չունի մանկապարտեզ, և նոր է կառուցվում, թերևս մինչև տարեվերջ շահագործման կհանձնվի: Կան համայնքներ, որոնք կառուցելու ծրագրեր են ներկայացրել: Մի խոսքով՝ անընդհատ, ամենօրյա ռեժիմով աշխատում ենք այդ ուղղությամբ՝ շեշտը դնելով կրթական ոլորտի վրա, որովհետև հենց մանկապարտեզներից է սկսում մեր երեխաների կրթությունը, դաստիարակությունը: Համայնքում մանկապարտեզ չունենալը լուրջ խնդիր է։ Մարզում չպետք է ունենանք համայնք, որտեղ մանկապարտեզ չկա։
– Պարոն Սահակյան, մարզի համայնքների ղեկավարների են փոփոխություններ են տեղի ունենում, որոշ համայնքապետեր հրաժարականներ են ներկայացնում: Ինչո՞վ է դա պայմանավորված, ինչի՞ հեաևանք է:
– Այս ընթացքում 2 վարչական շրջանի ղեկավար, իրենց դիմումի համաձայն, ազատվել են աշխատանքից: Ինչ վերաբերում է Քանաքեռավանի համայնքի ղեկավարին, ապա նրա պաշտոնավարման ժամկետը լրացել է, և նա ժամկետը երկարացնելու ցանկություն նույնպես չի հայտնել: Նշանակվել է ժամանակավոր պաշտոնակատար: Առաժմ այսքանն է, իսկ եթե լինեն նման դեպքեր, ապա կապված է լինելու միմիայն աշխատանի որակի հետ: Այսինքն՝ բոլորս էլ հասկանում ենք՝ նրանք ընտրված մարմիններ են և պետք է աշխատեն ի նպաստ համայնքի: Մենք ազդեցություն չունենք նրանց պաշտոնավորելու վրա, բայց փորձում ենք առաջարկել աշխատանք գտնել այլ ոլորտում, եթե չեն կարողանում ճիշտ ղեկավարել համայնքը: Կարծում եմ՝ կընդունեն մեր առաջարկը, բայց առաժմ նման դեպքեր չունենք։
– Մարզպետարանում ունե՞ք կադրերի պակաս։
– Կադրային խնդիր առայժմ չունենք: Գուցե հետագայում առաջանա՝ կապված տարվող աշխատանքի ծավալի, տեմպի, որակի հետ։
– Պարոն Սահակյան, իսկ մարզպետարանի ենթակայության ներքո գտնվող հաստատությունների ղեկավարների, աշխատակիցների փոփոխություններ եղե՞լ են։
– Ո՛չ, փոփոխություններ չեն եղել, բոլորի հետ աշխատում ենք և շարունակելու ենք աշխատել, եթե, իհարկե, բավարարեն մեր բոլոր պահանջները, այսինքն՝ պատրաստ լինեն աշխատելու հանուն մարզի բարօրության: Հակառակ դեպքում չենք աշխատի։
– Պարոն Սահակյան, Ձեր կարծիքով՝ մարզում թիվ մեկ խնդիրը ո՞րն է:
– Թիվ մեկ խնդիրը գյուղատնտեսության ոլորտն է, մասնավորապես՝ առաջնային խնդիր է ոռոգման ջրի համակարգը: Ինչպես մարզում, այնպես էլ, կարծում եմ, ողջ հանրապետությունում լուրջ արդիականացման կարիք ունի ոռոգման համակարգը: Հնամաշ, քայքայված ոռոգման համակարգի պատճառով ջրի ահռելի կորուստ ենք ունենում: Այս ուղղությամբ նույնպես աշխատանքներ են տարվում, խրախուսում ենք անցումը կաթիլային համակարգի, աջակցում ենք մարզում տարբեր ծրագրեր իրագործելու, միաժամանակ տարբեր ծրագրեր ենք առաջարկում տնտեսվարողներին:
Ի դեպ, սուբվենցիոն ծրագրերով տարբեր համայնքներում այս պահին էլ ոռոգման համակարգի կառուցման աշխատանքներ են կատարվում, որոշակի քայլեր են ձեռնարկվում, որպեսզի այդ համակարգը զարգանա: Հենց ոռոգման համակարգից է կախված մեր գյուղատնտեսության զարգացման հետագան: Կառավարությունն ունի տարբեր ծրագրեր, որոնք մեծ թափով այսօր կատարվում են:
Այսօր ոչ բավարար վիճակում է գտնվում ոռոգման համակարգը. սա է ամենակարևոր և շտապ լուծում պահանջող խնդիրը։
– Իսկ որպես գյուղատնտեսության ճյուղ՝ անասնապահությունը զարգացա՞ծ է մարզում։ Բնակիչները՝ ֆերմերները օգտվո՞ւմ են «Փոքր և միջին «խելացի» անասնաշենքների կառուցման կամ վերակառուցման և դրանց տեխնոլոգիական ապահովման պետական աջակցության» ծրագրից։
– Այո, մարզում անասնապահությունը զարգացած է: Ձեր նշած ծրագին մասնակցող ֆերմերներ կան: Մարզում կան մի քանի շեշտված համայնքներ, որտեղ բնակչությունը զբաղվում է լուրջ անասնապահությամբ: Օրինակ Գեղաշեն համայնքում կան բավականին մեծ ֆերմերային տնտեսություններ, որոնցից մեկը ունի մոտ 6200 խոշոր եղջերավոր կենդանի: Նման ֆերմաներ հանրապետությունում քիչ են: Այս տարի խնդիր ունենք անասնակերի հետ, և այդ ուղղությամբ աշխատում ենք և՛ ֆերմերների, և կառավարության հետ, փորձում ենք լուծում գտնել, թե որտեղից է հնարավոր կեր ձեռք բերել, չենք բացառում՝ գուցե նաև ներմուծման միջոցով:
Մենք մշտապես կապի մեջ ենք տնտեսվարողների, համայնքի ղեկավարների հետ: Այդ հարցը պետք է արագ կարգավորենք:
