Շովիում հայտնաբերվել է 18-րդ դին, անհետ կորած 20 անձ կա, որից 7-8-ը՝ երեխաներ. ինչ է հայտնի աղետի մասին
Վրաստանի Ռաճայի մարզի Շովի հանգստավայրում տեղի ունեցած տարերային աղետի զոհերի թիվն այսօր կեսօրի դրությամբ հասել է 18-ի։
Տեղեկությունը հաստատում է Վրաստանի ներքին գործերի նախարարության արտակարգ իրավիճակների կառավարման ծառայությունը։
ՆԳՆ-ի տեղեկությամբ, գիշերը հատուկ լուսավորության կիրառմամբ շարունակվել են որոնողական աշխատանքները, որոնք ընթանում են արտակարգ ռեժիմով: Նշենք, որ նախորդ օրերի ընթացքում գիշերվա ժամերին տեղում չեն աշխատել:
Վրաստանի առողջապահության նախարար Զուրաբ Ազարաշվիլիի խոսքով, աղետի գոտում կորածների թվում 7-8 երեխա կա։ Ըստ նախարարի՝ այս պահի դրությամբ, ընհանուր առմամբ, փնտրում են 20 մարդու։
Շովիում այսօր առավոտից վերսկսվել են տարերային աղետի հետևանքների վերացման աշխատանքները, որում ներգրավված են պաշտպանական ուժերը։ Բացի փրկարարներից, տեղում են նաև որոնվող անձանց մտերիմներն ու կամավորները: Զոհվածներից յոթի ինքնությունը հայտնի է։
Այս պահին աղետի գոտուց 210 մարդ է տարհանվել։
Հիշեցնենք՝ գոստոսի 3-ին, ժամը 16:00-ի սահմաններում տեղեկություն տարածվեց, որ Շովի հանգստավայրում սողանքային գործընթացներ են ակտիվացել: Փրկարարական աշխատանքները սկսվել են ծանուցումից մոտ 3 ժամ անց։
Վրացական ընդդիմության ներկայացուցիչները հայտարարել են, որ զոհերի ու վիրավորների նման մեծ թիվը պայմանավորված է տեղական իշխանությունների դանդաղկոտությամբ, որոնք հետաձգել են փրկարարական գործողության մեկնարկը։
Վրաստանի կառավարության ղեկավար Իրակլի Կոբախիձեն իր հերթին հորդորել է հապճեպ եզրակացություններ չանել և սպասել պաշտոնական հետաքննության արդյունքներին։
Որոնողական աշխատանքներին մասնակցում են հարյուրավոր մարդիկ: Դրանք վերջին օրերին իրականցվում են 600 մարդու՝ 400 փրկարարի և 200 զինվորականի ուժերով, այդ թվում՝ Արևելյան հրամանատարության ռազմաինժեներական գումարտակը և Ազգային գվարդիայի 102-րդ գումարտակի անձնակազմը։ Գործողություններին մասնակցում են ինոլոգները, հրշեջներ և այլ մասնագետներ։ Ծանր տեխնիկան մաքրում է անմատչելի տարածքները սողանքային զանգվածներից:
Անհայտ կորածների որոնումները կատարվում են նաև օդից, գործում են ուղղաթիռներ, որոնց խանգարում են օդ հանված անօդաչու սարքերը։
«Աղետի գոտում անօդաչու սարքեր օգտագործելու ցանկություն հայտնող քաղաքացիներին հորդորում ենք ինքնուրույն որոշումներ չընդունել, քանի որ դա վտանգ է ներկայացնում աղետի գոտում գործող ուղղաթիռների համար»,-ավելի աղ հայտարարլ է Վրաստանի ՆԳՆ Արտակարգ իրավիճակների կառավարման ծառայությունը:
Ողբերգության գոտում աշխատում են բժիշկներն ու ԿԽՄԿ-ի ներկայացուցիչները։ Վրաստանում տեղի ունեցած ողբերգությամբ պայմանավորված օգոստոսի 7-ը հայտարարվել է սգո օր, մինչև օգոստոսի 8-ը չեղարկվել են համերգները Շեքվետիլիի Black Sea Arena համերգասրահում և Բաթումիի MONO HALL ակումբում։
Վրաստանի լեռներից սողանքը սկսել է սահել օգոստոսի 3-ին: Այն առաջացել է հորդառատ անձրևների, սառցադաշտերի հալման և սելավների պատճառով: Ընդհանուր առմամբ, մոտ 5 մլն խմ հող է լցվել Շովի հանգստավայր, որը կազմում է մոտ 420 ֆուտբոլի դաշտի տարածք։
Հանգստավայրն էապես ավերված է։ Վնասվել է ճանապարհը, ավերվել են կամուրջներ և այլ ենթակառուցվածքներ ևս։
Փորձագետները կարծում են, որ տարածաշրջանում արտակարգ դեպքի կրկնության վտանգ չկա։
Շովի հանքային աղբյուրները և լեռնային ամենամաքուր օդը տասնամյակներ շարունակ համարվում էին բուժիչ թոքերի և ստամոքսի հիվանդություններ ունեցող մարդկանց համար։ Հանգստավայրը հայտնի է դարձել դեռ խորհրդային տարիներից:
