Ուկրաինան պետք է հրաժարվի կորցրած տարածքներից․ Բրազիլիայի նախագահ

Բրազիլիայի նախագահ Լուիս Ինասիո Լուլա դա Սիլվան ցանկանում է համագործակցել Չինաստանի և Արաբական Միացյալ Էմիրությունների (ԱՄԷ) հետ՝ ռուս-ուկրաինական պատերազմում խաղաղություն հաստատելու համար:

Deutsche Welle-ի փոխանցմամբ, Լուլա դա Սիլվան ասել է, որ այս նախաձեռնությունն արդեն քննարկել է Չինաստանի և ԱՄԷ-ի ղեկավարության հետ։

Նա նշել է, որ արդեն զրուցել է Չինաստանի առաջնորդ Սի Ծինփինի և ԱՄԷ նախագահ Շեյխ Մուհամեդ բին Զայեդ Ալ Նահյանի հետ՝ միջնորդական խմբի ստեղծման վերաբերյալ։ Այն կարող է ձևավորվել G20-ի նմանությամբ, կարծում է Բրազիլիայի ղեկավարը։

«G-20-ը ստեղծվել է ճգնաժամի մեջ գտնվող համաշխարհային տնտեսությունը փրկելու համար»,- հիշեցրել է Լուլա դա Սիլվան և հավելել,- «Այժմ կարևոր է ստեղծել այլ տեսակի G20՝ այս պատերազմը վերջ տալու և խաղաղություն ապահովելու համար»։

Բրազիլիայի նախագահը մանրամասնել է նաև, որ նախաձեռնությունը քննարկել է ԱՄՆ նախագահ Ջո Բայդենի, Գերմանիայի կանցլեր Օլաֆ Շոլցի, Ֆրանսիայի նախագահ Էմանուել Մակրոնի և հարավամերիկյան մի քանի պետությունների ղեկավարների հետ։

Բրազիլիայի նախագահը կարծում է, որ «Եվրոպան և ԱՄՆ-ն շարունակում են յուրովի նպաստել պատերազմի շարունակմանը» և նրանցից պահանջել է «նստել բանակցությունների սեղանի շուրջ և ասել «բավական է»։ Ես հավատում եմ, որ «մենք կհասնենք». մեծ հաջողություն»՝ միջնորդական նախաձեռնության միջոցով, հավելել է Բրազիլիայի նախագահը։

Ավելի վաղ՝ ապրիլի 15-ին, Պեկին կատարած այցի ժամանակ Լուիս Ինասիո Լուլա դա Սիլվան ԱՄՆ-ին կոչ էր արել դադարեցնել ռազմական աջակցությունն Ուկրաինային։ Եվրամիությունը, ըստ Բրազիլիայի ղեկավարի, նույնպես պետք է «սկսի խոսել խաղաղության մասին»։

Բացի այդ, Լուլան ֆրանսիական Le Figaro-ի խմբագրությանը տված հարցազրույցում կարծիք է հայտնել, որ Կիևը պետք է համաձայնի Ղրիմի միացմանը Ռուսաստանին, ինչպես նաև վերաիմաստավորի պատերազմի սկզբից ռուսական զորքերի կողմից գրավված տարածքների կարգավիճակը։ 
«Նախագահ Զելենսկին չի կարող ամեն ինչ ցանկանալ: Պետք է լուծում գտնել, քանի որ ամբողջ աշխարհը խաղաղություն է պահանջում»,- ասել է Լուլան։

Ուկրաինան, ի պատասխան, հայտարարեց, որ բարձր է գնահատում Բրազիլիայի նախագահի ջանքերը՝ ռուսական ագրեսիան կասեցնելու համար լուծում գտնելու համար, սակայն ստիպված է հիշեցնել, որ «իր տարածքների առևտուր չի անում»։  

«Ուկրաինայի դիրքորոշումը մնում է անփոփոխ. խաղաղության վերականգնման ցանկացած միջնորդական ջանք պետք է հիմնված լինի Ուկրաինայի ինքնիշխանության հարգման և տարածքային ամբողջականության ամբողջական վերականգնման վրա՝ ՄԱԿ-ի կանոնադրության սկզբունքներին համապատասխան», – նշել էր  Ուկրաինայի ԱԳՆ մամուլի խոսնակ Օլեգ Նիկոլենկոն։

Հայտնի է, որ Բրազիլիան, ինչպես Չինաստանը, չի դատապարտել Մոսկվայի ներխուժումն Ուկրաինա, չի միացել նաև հակառուսական պատժամիջոցներին։

Exit mobile version