ՎՍՏԱՀԵ՞ՆՔ ԱԴՐԲԵՋԱՆՑԻ ԳԵՆԵՐԱԼԻՆ ԹԵՅ ՈՒ ՄՈՒՐԱԲԱՅՈՎ ԴԻՄԱՎՈՐՈՂԻՆ
Ինչպես գիտենք, դեկտեմբերի 5-ին մի շարք խոշորացված համայնքներում, այդ թվում Վարդենիս համայնքում տեղի են ունենալու ընտրություններ։ «Գործարար Հայելի» լրատվականի լրագրողը այցելել է Վարդենիս և զրուցել քաղաքացիների հետ: Վերջիններս պատմում էին համայնքի գործող ղեկավար Արամ Մելքոնյանի և ադրբեջանցի գեներալի հանդիպման մասին: Այս առիթով ավելի մանրամասն տեղեկություններ հայտնեց Վարդենիս համայնքի բնակիչ, Երկրապահ կամավորական միության անդամ, Արցախյան առաջին ազատամարտի մասնակից, 2016 թ. քառօրյա պատերազմի մասնակից Կարեն Աղաբեկյանը, որի որդին 2020 թ. Արցախյան երկրորդ պատերազմի ընթացքում մասնակցել է Ջրականում մղվող մարտերին:
2020 թ. պատերազմից հետո, երբ Քարվաճառի շրջանը Նիկոլի թեթև ձեռքով տրվեց Ադրբեջանին, այդ ընթացքում Վարդենիսի քաղաքապետը զբաղվել է թուրքերին դիմավորելով, մինչդեռ նա ի պաշտոնե իրավունք չուներ: Այդ տարածքում կարող էր լինել Գեղամասարի համայնքապետը, ոչ թե ինքը, բայց իրեն թույլ է տվել, գնացել և Սոթքի տարածքում ընդունել է ադրբեջանցի գեներալին։
– Ես անձամբ ներկա չեմ եղել այդ հանդիպմանը, դրա մասին ինձ պատմել է Վարդենիս համայնքի գործող ղեկավար Արամ Մելքոնյանը,- ասաց Կարեն Աղաբեկյանը և շարունակեց,- ես նրան հրավիրել եմ Երկրապահ կամավորականների շենք, որպեսզի գա և պարզաբանի աղմուկ հանած հանդիպման մասին, բացատրի, թե ինչու է ինքը այնտեղ եղել: Նա էլ պատմեց, որ ադրբեջանցի գեներալին հրավիրել է թեյ խմելու և նրանից ստացել է պատասխան, թե՝ իր հետ ջուր խմելու կարիք անգամ չունի, ուր մնաց թեյ։ Այսինքն՝ 1915 թվականին իր նման հայերը աղ ու հացով են թուրքին դիմավորել, հիմա էլ ինքը թեյով ու մուրաբայով է ադրբեջանցի գեներալին դիմավորում։ Գեներալն էլ մերժել է հյուրասիրությունը։ Քաղաքապետն ինձ ասաց, որ դա մոտեցման ձև է եղել, այլ կերպ չէր կարող մոտենալ, ծանոթանալ։ 1,5 կմ մեր տարածք են ներխուժել: Աստված չանի, բայց եթե վաղը հրաման լինի, որ պետք է հետ գնալ և Սոթքն էլ, Կութն էլ, Վերին Շորժան էլ տան, համայնքի նման ղեկավարը կընդդիմանա՞ իշխանության դեմ՝ պնդելով, որ դա իր հողն ու ջուրն է: Իհարկե ո՛չ։
Գործող քաղաքապետը 2019 թ. էյֆորիայի ազդեցության տակ ընտրվել է համայնքի ղեկավար՝ որպես Նիկոլի թիմակից: Երկար տարիներ ապրել է Մոսկվայում: «Այս երեք տարում նա նույնիսկ չի հասցրել ճանաչել մեր համայնքի բնակիչներին: Նախկին մարզպետ, այժմ տարածքային նախարար Գնել Սանոսյանի աջակցությամբ նշանակվել է համայնքի ղեկավարի պաշտոնակատար, այնուհետև ընտրվել է համայնքի ղեկավար»,- ասաց Կ. Աղաբեկյանը և վստահեցրեց, որ ասֆալտապատման, մայթերի կառուցման և կատարված այլ աշխատանքները, որ քարոզարշավի ընթացքում նա ներկայացնում է իբրև իր ձեռքբերումներ, համայնքի նախկին ղեկավար Արամ Հարությունյանի և նրա տեղակալ Կարենի Մկրտչյանի աշխատանքի շնորհիվ են այդ ծրագրերը հաստատվել, որից հետո շինարարությունն իրականացվել է այժմ գործող ղեկավարի՝ Արամ Մելքոնյանի օրոք. «Անգամ կարող եմ ասել, որ նախկին իշխանության օրոք է այդ ծրագրերը տրվել համայնքին»։
– Անձնական ոչինչ չունեմ ոչ մի թեկնածուի նկատմամբ,- ասում է Կ. Աղաբեկյանը,- բայց պետք է համայնքի այնպիսի ղեկավար ընտրենք, որ մտածի մեր համայնքի և բնակիչների մասին։ Մեր համայնքի համար այժմ առաջնայինը անվտանգության հարցն է, մեր համայնքը սահմանամերձ է, ինչպե՞ս կարող ենք վստահել մեր համայնքի կառավարումը նրան, ով ադրբեջանցի գեներալին թեյի է հրավիրում…
Կ. Աղաբեկյանը վստահ է՝ այս ընտրություններն էլ բազմաթիվ կարևորագույն խնդիրներից, երկրի անվտանգության հիմնախնդիրներից ժողովրդի ուշադրությունը շեղելու նպատակ են հետապնդում։ Եվ կոչ է անում. «Սթափվեք, իմ հա՛յ ժողովուրդ, վարդենիսցիներ, մեզ համար այժմ ամենկարևորը մեր հայրենիքն է, մեր երկրի անվտանգությունը, որը կարող ենք ապահովել, եթե մեր համայնքի և երկրի ղեկավարումը վստահենք նրան, ով դա կարող է անել»։
Վարդենիս խոշորացված համայնքի կայանալիք ընտրություններում առաջադրվել է երեք քաղաքական ուժ՝ «Ահարոն Խաչատրյան» կուսակցությունների դաշինք՝ Տորֆավան համայնքի ղեկավար Ահարոն Խաչատրյանի գլխավորությամբ, «ՔՊ» կուսակցություն՝ համայնքի գործող ղեկավար Արամ Մելքոնյանի գլխավորությամբ, «Միասնական Վարդենիս» կուսակցությունների դաշինք՝ համայնքի նախկին ղեկավար Արամ Հարությունյանի գլխավորությամբ:
