Կոտայքի մարզի Քասախ գյուղում մեկ անձի մահվան և երկու անձի ծայրահեղ ծանր վիճակում հիվանդանոց տեղափոխման դեպքով Քննչական կոմիտեում նախաձեռնվել է քրեական վարույթ՝ քրեական օրենսգրքի 412-րդ հոդվածի 2-րդ մասին 2-րդ կետի հատկանիշներով, այն է՝ անվտանգության պահանջներին չհամապատասխանող հումքերի կամ ապրանքների շրջանառությունը, աշխատանքների կատարումը կամ ծառայությունների մատուցումը։ Այս մասին հայտնեց Քննչական կոմիտեի մամուլի խոսնակ Գոռ Աբրահամյանը։
«Դեպքի վայրի զննություն է իրականացվել, այս պահին ակտիվ նախաքննություն է իրականացվում, դատաբժշկական փորձաքննություն է նշանակված, դեպքի հանգամանքները պարզվում են»,–հայտնեց Քննչական կոմիտեի մամուլի խոսնակ Գոռ Աբրահամյանը։
Նախնական վարկածով շմոլ գազից թունավորում է տեղի ունեցել։
Հիշեցնենք, որ հոկտեմբերի 16-ին առավոտյան Քասախ գյուղի բնակարաններից մեկում հայտնաբերվել է մեկ անձի դի, երկու անձ էլ ծայրահեղ ծանր վիճակում տեղափոխվել է «Արմենիա» ԲԿ։