Օպերային թատրոնի արտիստները երաժշտասերներին հորդորում են առցանց դիտել «Կարմեն» ներկայացումը
ԵՐԵՎԱՆ, 10 ՀՈՒՆԻՍԻ, ԱՐՄԵՆՊՐԵՍ: Ալ. Սպենդիարյանի անվան օպերայի և բալետի ազգային ակադեմիական թատրոնի արտիստները տեսանյութ են հրապարակել համացանցում, որում հանդիսատեսին հորդորում են օնլայն հարթակում դիտել ֆրանսիացի ականավոր կոմպոզիտոր Ժորժ Բիզեի «Կարմեն» օպերային ներկայացումը:
«Արմենպրես»–ի հաղորդմամբ՝ ներկայացումն օպերային թատրոնի «Ֆեյսբուք»-ի պաշտոնական էջում կհեռարձակվի հունիսի 12-ին՝ ժամը 20:00-ին:
Տեսանյութում «Կարմեն» օպերայի բեմադրող ռեժիսոր Նաիրե Ստեփանյանը, Կարմենի և Խոսեի դերակատարներ՝ Կարինե Բաբաջանյանն ու Լիպարիտ Ավետիսյանը նշում են, որ այս օրերին բոլորը փորձում են հարմարվել կյանքի նոր կանոններին, և իրենք վստահ են, որ հանրությունը նույնպես կարոտել է թատրոնը, և, քանի որ չեն կարող բոլորին հրավիրել թատրոն, օնլայն հարթակի շնորհիվ թատրոնը կբերեն երաժշտասերների տուն:
«Կարմեն» օպերան առաջին անգամ բեմադրվել է 1875 թվականի մարտի 3-ին Փարիզի «Օպերա Կոմիկ» թատրոնում: Օպերան սկզբնական շրջանում սուր քննադատության է արժանացել, սակայն 1875-ի հոկտեմբերին բեմադրվել է Վիեննայում, ինչից էլ սկսվել է «Կարմեն»-ի համաշխարհային հռչակը: Դեռևս 1880 թվականին Պյոտր Չայկովսկին կանխատեսել է, որ Բիզեի «Կարմեն»-ը միշտ կմնա աշխարհում ամենաճանաչված ու ամենասիրված օպերան:
«Կարմեն» օպերան Հայաստանում առաջին անգամ բեմադրվել է 1924 թվականին Լենինականի (ներկայում` Գյումրի) օպերա-օպերետային թատրոնում, իսկ Երևանի օպերայի և բալետի թատրոնում՝ 1934 թվականին (դիրիժոր՝ Ս. Չարեկյան, բեմ.՝ Ա. Բուրջալյան):
